Það var vart þverfótað fyrir kóngafólki í miðborg Lundúna í dag þegar formleg hátíðarhöld í tilefni af afmæli Englandsdrottningar fóru fram.

Þetta er í fyrsta sinn sem Meghan Markle, hertogaynjan af Sussex, kemur opinberlega fram eftir fæðingu Archie, sem kom í heiminn fyrir fjórum vikum. Archie sjálfur var reyndar hvergi sjáanlegur. 

Athöfnin kallast „Trooping the Colour“ sem mætti útleggjast sem „Marsering litadýrðarinnar“ þar sem yfir þúsund hermenn marsera í skrúðgöngu og flugvélar mynda fánaliti Bretlands á himninum yfir herlegheitunum.

Hefðin er aldagömul og talið er að skrúðgangan hafi fyrst verið farin í valdatíð Karls II á 17. öld. Árið 1748 var ákveðið að skrúðgangan færi fram til að halda upp á afmæli þjóðhöfðingjans. Skrúðgangan fer því alltaf fram um þetta leyti, óháð afmælisdegi sitjandi þjóðhöfðingja. Elísabet Englandsdrottning hélt upp á 93 ára afmæli sitt 21. apríl síðastliðinn.

Nánast öll stórkonungsfjölskyldan fylgdist með hátíðarhöldunum. Filippus prins var reyndar hvergi sjáanlegu, en á því er eðlileg skýring þar sem drottningarmaðurinn settist í helgan stein hvað varðar opinberar athafnir fyrir tveimur árum.

Elísabet Englandsdrottning, heiðursgesturinn, fylgdist grannt með skrúðgöngunni og það sama á við um barnabörn hennar Harry og Vilhjálm auk eiginkvenna þeirra og barna. Theresa May forsætisráðherra var einnig á meðal gesta.

Að skrúðgöngunni lokinni safnaðist konungfjölskyldan saman á svölum Buckingham-hallar og fylgdist með þotum flughersins lita himininn í bresku fánalitunum. Það féll vel í kramið hjá börnunum líkt og sjá má á myndunum hér að neðan.