Getgátur eru um það að raunveruleikaþáttastjarnan og viðskiptakonan Kylie Jenner muni selja hluta í snyrtivörufyrirtæki sínu Kylie Cosmetics á næstu mánuðum.
Samkvæmt heimildarmanni Womens Wear Daily er alþjóðafyrirtækið Coty Inc. að vinna í samningum um að kaupa 51% hlut í Kylie Cosmetics fyrir 600 milljónir Bandaríkjadala eða um 74 milljarða íslenskra króna. Coty á snyrtivörumerki eins og Cover Girl, O.P.I. og Sally Hansen.
Fyrri fréttir WWD herma að Jenner sé búin að vera skoða möguleika síðustu mánuði að hagnast enn frekar á fyrirtæki sínu. Kris Jenner, umboðsmaður hennar og mamma, hefur áður sagt að það sé alltaf einhver áhugi á snyrtivörufyrirtækinu. Þær bíði nú eftir rétta tækifærinu til að selja hlut í fyrirtækinu.
Jenner er nú þegar orðin milljarðamæringur, aðeins 21 árs gömul, og eru auðæfi hennar metin á um 1 milljarð Bandaríkjadala.
Vörumerki Coty má finna í mörgum verslunum, meðal annars hér á landi. Gangi þessir samningar í gegn gætu vörur Kylie verið mun aðgengilegri en nú, en vörur hennar er aðeins hægt að kaupa á vefsíðu fyrirtækisins og í Ultra Beauty í Bandaríkjunum.