Tónlistarmaðurinn Taboo úr hljómsveitinni Black Eyed Peas þáði boð um að mæta á sumarhátíð Dans-Brynju Péturs sem var haldin á Ingólfstorgi á laugardaginn.
Hann mætti með myndatökumann með sér og tóku þeir upp sýninguna og danspartí sem þar var haldið. Heilsaði hann dönsurunum og dansaði lengi með hópnum.
„Taboo gekk beint inn í hringinn, knúsaði alla og dansaði sjálfur nokkrum sinnum,“ segir Brynja Péturs og bætir við að hann hafi einnig tekið viðtöl við þau sem verða sýnd í þáttum þar sem hann heimsækir dansara frá þeim löndum þar sem Black Eyed Peas spila. Hljómsveitin spilaði einmitt á hátíðinni Secret Solstice í Laugardalnum um síðustu helgi.
„Við eldri kynslóðin erum búin að hlusta á tónlistina þeirra í yfir 20 ár og þarna mætir einn þeirra og dansar með okkur á Íslandi. Þetta var ógleymanlegt og mikill punktur yfir i-ið á nú þegar flottum degi á laugardaginn.“
Sumarhátíðin var einnig söfnun fyrir dansarana í hópnum en yfir 20 dansarar frá Dans-Brynju Péturs eru að fljúga til Portúgal á næstu dögum til að taka þátt í danskeppni. Þetta verður fyrsta keppnisferð hópsins erlendis.