Streymisveitan Netflix hefur ákveðið að klippa út atriði úr fyrstu seríu af þáttunum 13 Reasons Why. Umrætt atriði sýnir í smáatriðum hvernig aðal söguhetja þáttanna tók sitt eigið líf.
Fyrsta sería af 13 Reasons Why var frumsýnd á Netflix fyrir 2 árum og er þriðja sería væntanleg á næstu mánuðum. Þættirnir eru byggðir á samnefndri bók Jay Asher en þeir hlutu mikla gagnrýni þegar þeir komu fyrst út.
Í tilkynningu sem Netflix sendi frá sér í gær kemur fram að þau hafi fengið að heyra frá ungu fólki að þættirnir hafi hvatt það til að sækja sér aðstoð og tala um tilfinningar sínar.
„Áður en við gerum þriðju seríu af 13 Reasons Why aðgengilega á veitum okkar seinna í sumar höfum við tekið tillit umræðunnar sem hefur skapast um þættina. Að ráði sérfræðinga, þar á meðal Dr. Christine Moutier, yfirmanni Bandarísku forvarnarsamtakanna gegn sjálfvígum, höfum við ákveðið ásamt höfundi þáttanna Brian Yorkey og framleiðendum þáttanna að klippa út atriðið þar sem Hannah tekur sitt eigið líf í fyrstu seríu,“ segir í tilkynningu Netflix.
Þættirnir voru meðal annars gagnrýndir fyrir að sýna sjálfsvíg í jákvæðu ljósi og einnig mikið af smáatriðum tengst sjálfsvígum.
Í upphafi hvers þáttar í annarri seríu voru settar viðvaranir og áhorfendum bent á hvert þeir gætu sótt sér aðstoð ef þeir glímdu við þunglyndi, kvíða eða sjálfsvígshugsanir. Nú hefur Netflix stigið skrefinu lengra og tekið út atriðið sem sýnir sjálfsvígið.
Líkt og segir í tilkynningu streymisveitunnar hefur umræðan um þættina verið hávær. Í maí kom út skýrsla sem gaf til kynna að fleiri unglingsdrengir hafi tekið sitt eigið líf á fyrsta mánuðinum eftir útgáfu þáttanna. Skýrslan sýndi þó aðeins fram á fylgni en ekki orsakasamband og náði aðeins til unglingsdrengja, ekki unlingstúlkna eða fullorðinna.
„Vandamálið er að allar uppbyggilegar leiðir til að vinna úr tilfinningavanda ungs fólks falla í skuggann fyrir útleið Hönnuh í þáttunum. Uppbyggingin er með þeim hætti að sjálfsvígið virðist nánast vera rökrétt afleiðing af því hvernig komið hefur verið fram við hana án þess að margar aðrar leiðir, eins og að leita til foreldra, vina, hjálparsíma, heilsugæslu eða ráðgjafa til að leysa vandann, séu skoðaðar,“ sagði Anna Gunnhildur Ólafsdóttir, framkvæmdastjóri Geðhjálpar, í viðtali við mbl.is skömmu eftir útgáfu þáttanna.