Marta Lovísa Noregsprinsessa og norska konungsfjölskyldan greindu frá því í gær að prinsessan væri hætt að nota prinsessutitilinn við ákveðin tilefni. Umræða um hvernig hún notaði prinsessutitil sinn skapaðist í vor þegar hún kynnti nýjan kærasta og fyrirlestraferð þeirra undir yfirskriftinni „Prinsessan og seiðmaðurinn“.
Prinsessan hefur þó ekki afsalað sér prinsessutigninni. Á heimasíðu konungsfjölskyldunnar kemur fram að prinsessan muni áfram nota prinsessutitilinn þegar hún kemur fram fyrir hönd fjölskyldunnar og í einkaerindum. Hún mun hins vegar nota nafn sitt, Marta Lovísa, þegar hún sinnir verkefnum í hagnaðarskyni.
Marta Lovísa greindi einnig frá ákvörðuninni á Instagram-síðu sinni. Sagði hún þar að henni þætti leitt hvernig hún hafi notað titilinn og það hafi verið mistök að nota prinsessutitilinn á þann hátt sem hún gerði.
Marta Lovísa afsalaði sér titlinum „konungleg hátign“ og lífeyri frá konungshöllinni árið 2002 og sagðist þá vilja frelsi til að sinna áhugamálum sínum. Hún rak lengi englaskóla ásamt samstarfskonu sinni, Elisabeth Nordeng, og þær skrifuðu tvær bækur til að hjálpa fólki að komast í samband við engla.
View this post on InstagramA post shared by Princess Märtha Louise (@princessmarthalouise) on Aug 7, 2019 at 4:09am PDT