Leikkonurnar Jana Kramer og Bethany Joy Lenz sammæltust um það í hlaðvarpsþætti Kramer að höfundur þáttanna One Tree Hill hafi skapað vandræði á tökustað.
Kramer og Lenz léku báðar í unglingaþáttunum vinsælu sem voru sýndir frá 2003 til 2012. Höfundur þáttanna, Mark Schwahn, hefur verið sakaður um kynferðislega áreitni árið 2017 af fjölda kvenna sem komu að þáttunum.
Þær segja að hann hafi búið til togstreitu á milli leikaranna og klofið hópinn í A-lið og B-lið. Lenz lék í öllum 9 seríunum sem gerðar voru, en Kramer aðeins í þremur síðustu seríunum.
Í hlaðvarpsþættinum ræða þær einnig um endurfundi One Tree Hill og segja að það gæti orðið gaman. Lenz segir að henni lítist ekki á að gera fleiri þætti, þar sem Schwahn muni græða á því, sama hvort hann kæmi að þáttunum eða ekki.
„Það væri frábært að fara til baka og ekki líða eins og það væri klofningur eða rifrildi í gangi. Ég held að við séum öll eldri núna, og það yrði miklu auðveldara að njóta þess að vera saman og njóta þess að fara í vinnuna. Kunna að meta það að hafa vinnu, meta það að eiga risastóran aðdáendahóp,“ sagði Lenz.