Söngkonan og fyrrverandi Disney-stjarnan Demi Lovato hefur bæst við leikarahóp Eurovision-myndarinnar. Lovato birti myndband af Will Ferrell á Instagram þar sem leikarinn og handritshöfundurinn greinir frá tíðindunum.
Í myndbandinu segist Will Farrell vera í tökum á nýjustu mynd sinni, Eurovision. Hann segist vera nýbyrjaður í tökum og segir þær ganga mjög vel. Hann greinir síðan frá því að Demi Lovato sé hluti af leikarahópnum. Hann óskar henni einnig til hamingju með afmælið en hún átti afmæli í gær.
Samkvæmt E! hafði Lovato sést í tökum í Bretlandi áður en tilkynningin kom í gær. Nafn hennar er komið á leikaralistann á Imdb en ekki kemur fram þar hvaða hlutverk hún leikur. Samkvæmt heimildum E! mun Lovato þó leika söngkonuna Katiönu sem lýst er sem einni af betri söngkonum Íslands.
Lovato hefur gert það gott sem söngkona síðustu ár en hún hóf ferilinn sem leikkona í söngleikjaþáttum á Disney-stöðinni. Lovato bætist í hóp Will Ferrells, Rachel McAdams og Pierce Brosnan sem fara öll með hlutverk í myndinni. Íslenku leikararnir Jóhannes Haukur Jóhannesson, Björn Hlynur Haraldsson, Nína Dögg Filippusdóttir og Álfrún Gísladóttir fara einnig með hlutverki í myndinni, en fregnir herma að Ólafur Darri Ólafsson og Hannes Óli Ágústsson muni einnig fara með hlutverk í myndinni, sem er framleidd fyrir streymisveituna Netflix.