Leikkonan Zoe Kravitz mun ekki fá sér bótox í handakrikana á næstunni ef marka má viðtal við hana í Vogue á dögunum. Kravitz er spurð út í fegurðarráð bæði góð og slæm í viðtalinu. Segist hún vera í áfalli við að heyra af bótoxi sem kemur í veg fyrir svitamyndun.
„Það er það heimskulegasta, ógnvænlegasta sem ég hef nokkurn tímann heyrt,“ sagði leikkonan og hvetur fólk til þess að láta ekki verða að því að fá sér bótox til að koma í veg fyrir svita. Segir hún mikilvægt að svitna.
Þessi nýstárlega leið til að koma í veg fyrir svita komst í fréttir á dögunum þegar fyrirsætan og samfélagsmiðlastjarnan Chrizzy Teigen greindi frá því að hún hefði fengið sér bótox í handakrikana.
Teigen sýndi frá því á samfélagsmiðlum þegar hún fékk sér bótox í handakrikana til að minnka svitamyndun. Teigen var mjög spennt í myndbandinu og sagði að þetta væri það besta sem hún hafði gert. Nú segist hún geta klæðst silki án þess að vera rennandi sveitt.