Erlendi slúðurvefurinn Daily Mail heldur því fram að elsti Beckham-sonurinn, Brooklyn Beckham, sé hættur með kærustu sinni, fyrirsætunni Hönu Cross. Brooklyn Beckham hefur ekki sést opinberlega með Cross síðan um miðjan júlí.
Cross sást gjarnan á samfélagsmiðlum hjá öðrum í Beckham-fjölskyldunni en hefur ekki verið á ferðalagi með þeim í sumar. Virtist hún til að mynda ekki vera með fjölskyldunni á Ítalíu á dögunum. Heimildarmaður Daily Mail segir parið vera hætt saman eftir átta mánaða samband.
Brooklyn Beckham og Cross eru sögð fylgja hvort öðru á Instagram en Beckham-sonurinn hefur þó ekki líkað við mynd af Cross síðan í lok júlí og á það sama við um fjölskyldu hans.
Parið komst í fréttir í maí þegar öryggisverðir þurftu að stía parinu í sundur. Voru David og Victoria Beckham þá sögð með áhyggjur af „eitruðu sambandi“ sonar síns við fyrirsætuna.