Kvikmyndin Hvítur, hvítur dagur eftir Hlyn Pálmason var frumsýnd í vikunni. Frumsýningagestir lofuðu leik aðalleikaranna og samspil þeirra. Það eru þau Ingvar E. Sigurðsson og Ida Mekkín Hlynsdóttir, dóttir leikstjórans, sem fara með aðalhlutverkin. Hér að ofan má sjá myndband sem sýnir að tenging þeirra nær lengra en bara á hvíta tjaldið.
Í myndbandinu segja þau skemmtilega frá tökuferlinu og hvernig þau hittust en það var í sundi fyrir tilviljun á Hornafirði. Ída er greinilega ánægð með mótleikara sinn og segir að ef mótleikarinn er góður þá verður maður öruggur.
„Ingvar E. Sigurðsson hefur nú þegar unnið til verðlauna bæði á Cannes og í Transylvaníu fyrir túlkun sína á Ingimundi. Hann er frábær leikari sem verður bara betri með árunum og er virkilega góður í hlutverki Ingimundar. Ída Mekkín Hlynsdóttir er algjörlega æðisleg í hlutverki Sölku og ljær persónu sinni afslöppun, gáska og kraft,“ skrifar Brynja Hjálmsdóttir kvikmyndagagnrýnandi um frammistöðu þeirra Ingvars og Ídu í dómi sínum í Morgunblaðinu á fimmtudaginn en myndin fékk heilar fimm stjörnur.
Hvítur, hvítur dagur segir frá Ingimundi sem er lögreglustjóri sem hefur verið í starfsleyfi frá því að eiginkona hans lést óvænt af slysförum. Í sorginni einbeitir hann sér að því að byggja hús fyrir dóttur sína og afastelpu, þar til athygli hans beinist að manni sem hann grunar að hafi átt í ástarsambandi við konu sína. Fljótlega breytist grunur Ingimundar í þráhyggju og leiðir hann til róttækra gjörða sem óhjákvæmilega bitnar einnig á þeim sem standa honum næst.