Skartaði nýju andliti eftir lýtaaðgerð

Sjónvarpsstjarnan Sharon Osbourne skartaði nýju andliti á sjónvarpsskjánum í vikunni. Osbourne er mjög ánægð með útkomuna og er ekki feimin við að tala um það sem hún lét gera við andlitið sér fyrir fimm vikum. 

Osbourne sagði í spjallþætti sínum The Talk að því er fram kemur á vef Page Six að hún hafi látið laga á sér hálsinn og svæðið í kringum kjálkana. Hin 66 ára gamla stjarna segir að læknarnir hafi eiginlega togað andlitið upp. „Allt lyftist bara,“ sagði stjarnan. 

Osbourne viðurkennir að vísu að fegurðin sé ekki sársaukalaus en fimm vikum seinna er hún enn að jafna sig. Hún finnur enn til, sérstaklega undir hökunni. 

Sjónvarpsstjarnan var líka mætt í þátt Jimmys Kimmels í vikunni þar sem Kimmel hrósaði henni fyrir vel heppnaða aðgerð. Þar var hún með kenningu um af hverju hennar lýtaaðgerð gekk svona ljómandi vel en ekki hafi allir sömu sögu að segja. Segir hún marga, bæði konur og karla, vilja láta laga á sér andlitið en því miður séu ekki allir jafnfærir sem bjóða upp á þjónustuna. 

• Blogga um frétt