Tónlistarkonan Glowie, eða Sara Pétursdóttir eins og hún heitir réttu nafni, skrifar í færslu á Instagram að kvíðinn hafi legið yfir henni eins og skuggi í sumar. Hún segist hafa grennst mikið og að það hafi komið niður á sjálfstrausti hennar.
„Stundum leið mér eins og mér leið í skólanum þegar ég var 10 ára gömul, átti erfitt með að finna föt sem pössuðu og var óörugg að sýna granna líkamann minn. Ég hélt að sú tilfinning væri alveg farin en því miður kom hún aftur,“ segir Glowie.
Glowie tjáir sig reglulega um þá erfiðleika sem hún þurfti að yfirstíga í grunnskóla, en henni var meðal annars strítt fyrir að vera of grönn.
Hún segist varla hafa trúað að sér liði svona þar sem hún hefur verið dugleg að tala um og syngja um jákvæða líkamsímynd. „En málið er að allir eru óöruggir og það er í lagi, bara góðu lagi,“ skrifar Glowie.
Glowie segir að þessar tilfinningar muni koma og fara og við þurfum að finna okkar eigin leiðir til að takast á við þær. Sjálf ætlar hún að fara í danstíma, á æfingar, borða heilsusamlegan mat, hugleiða, hrósa sjálfri sér í 5 mínútur á hverjum degi og dansa salsa á nærfötunum á morgnana.