Það muna margir eftir myndinni The Devil Wears Prada en nú berast þær stórfréttir að gera eigi söngleik upp úr sömu sögu að því fram kemur á vef Deadline. Myndin sem Anne Hathaway og Meryl Streep léku í frá árinu 2006 er byggð á bók með sama nafni eftir Lauren Weisberger.
Það eru engir aukvisar sem koma að gerð söngleiksins en sjálfur Elton John mun semja lög við texta Shainu Taub. Söngleikurinn verður frumsýndur í Chicago næsta sumar áður en hann verður frumsýndur á Broadway.
Konan á bak við söguna, Lauren Weisberger, var aðstoðarkona Önnu Wintour, ritstjóra Vogue, áður en hún skrifaði bókina The Devil Wears Prada. Fáum duldist að aðalpersónan, hin kaldlynda og kröfuharða Miranda Priestly, var byggð á persónu Wintour. Sjálf sagði Wintour að sér hefði verið „skemmt“ við að horfa á myndina.