Raunveruleikaþáttastjarnan Kylie Jenner og tónlistarmaðurinn Travis Scott hafa tekið sér pásu frá hvort öðru og ætla að eyða tíma í sundur.
Samkvæmt heimildarmanni TMZ hafa þau reynt að vinna í sambandi sínu síðustu mánuði en illa hefur gengið og því hafa þau ákveðið að taka sér pásu.
Jenner og Travis komu síðast saman fram opinberlega á frumsýningu heimildarmyndar Scott, Travis Scott: Look Mom I Can Fly, 27. ágúst. Jenner birti síðast mynd af Scott á samfélagsmiðlum 10. september.
Þau eiga eina dóttur saman, Stormi, sem er eins og hálfs árs, en þau hafa verið saman í rúmlega tvö ár. Scott fylgdi ekki Jenner í brúðkaup Bieber-hjónanna á mánudagskvöld, en en hún tók dóttur þeirra með í brúðkaupið.
Þau eru sögð hafa tekið sér pásu áður og aftur byrjað saman. Þau ætla að einblína á dóttur sína núna og vinna saman að uppeldi hennar.