Húsvíkingar eru í óða önn að gera allt tilbúið fyrir komu stórleikara til bæjarins um þessar mundir. Samkvæmt heimildum mbl.is er búið að girða af hluta hafnarsvæðisins fyrir tökulið True North. Svæðið verður afgirt fram á þriðjudaginn næsta, 15. október.
Tökur á Eurovision-kvikmynd Will Ferrell munu fara fram á Húsavík á næstu dögum og er leikarinn væntanlegur þangað nú í vikunni. Leikarinn Pierce Brosnan mun einnig fara með hlutverk í kvikmyndinni en hann er mættur til landsins. Rachel McAdams og tónlistarkonan Demi Lovato fara einnig með hlutverk í kvikmyndinni.
Þá hefur einnig þurft að fríska upp á hús í bænum til þess að þau líti sem best út í kvikmyndinni. Pakkhúsið, hús sem stendur við veitingahúsið Sölku, hefur verið málað í stíl við Sölku en það var áður í gulum lit. Þá var skólphús niður við bryggjuna klætt með timbri, en áður var andlit trúðs á húsinu.
Heimamenn eru margir hverjir gríðarlega spenntir fyrir umstanginu í bænum, enda ekki á hverjum degi sem stjörnur úr Hollywood leggja leið sína norður á Húsavík.