Björgunarsveitin Garðar á Húsavík mun koma að tökum á Eurovision-kvikmyndinni sem tekin verður upp þar í bæ.
Samkvæmt heimildum mbl.is verður hluti myndarinnar tekinn upp úti á Skjálfandaflóa. Báturinn Garpur RE 148 kom til Húsavíkur á mánudag en hann verður notaður í tökum fyrir kvikmyndina og mun björgunarsveitin aðstoða við tökur úti á flóanum.
Breski leikarinn Pierce Brosnan mun fara með hlutverk í myndinni og mætti hann til Húsavíkur í gær. Samkvæmt heimamönnum hefur Brosnan verið að mestu óáreittur og fengið góðar móttökur.
Leikarinn Will Ferrell mun einnig fara með hlutverk í myndinni en hann skrifaði handritið ásamt Andrew Steele. Leikkonan Rachel McAdams og tónlistarkonan Demi Lovato munu einnig leika í myndinni.
Fjöldi íslenskra leikara eru einnig með hlutverk í myndinni, Jóhannes Haukur Jóhannesson, Björn Hlynur Haraldsson og Nína Dögg Filippusdóttir eru þar efst á blaði.
Hjólhýsum hefur verið komið fyrir niðri við Húsavíkurhöfn, en svæði hefur verið girt af fyrir verkefnið.
Húsvíkingar hafa tjaldað öllu til í tilefni verkefnisins og hafa meðal annars málað og klætt hús svo bærinn skarti sínu fegursta fyrir Netflix. Töluverður fjöldi bæjarbúa hefur verið ráðinn í aukahlutverk og einhverjir leigt út eignir sínar fyrir tökur á kvikmyndinni.
Þórgunnur Reykjalín Vigfúsdóttir, skólastjóri Borgarhólsskóla, sagði í kvöldfréttum Rúv í gær að fjöldi barna í skólanum væri í leyfi í dag til þess að taka þátt í tökum.