Höfundur áströlsku þáttanna Nágranna eða Neighbours, Reg Watson, er látinn 93 ára að aldri. Watson var fæddur í Queensland í Ástralíu en flutti til Bretlands árið 1955 og vann að gerð þáttanna Crossroads þar.
Hann flutti síðar aftur til Ástralíu á 9. áratugnum og skapaði þættina Neighbours ásamt nafna sínum Reg Grundy. Watson var lýst sem frumkvöðli í dramaþáttagerð og yndislegum vinnufélaga.
Neighbours hafa haldið velli í 34 ár og hafa verið framleiddir lengst allra dramaþátta í Ástralíu. Þættirnir hafa notið mikilla vinsælda víða um heim og meðal annars hér á Íslandi.
Þættirnir hafa verið stökkpallur fyrir marga leikara á borð við Kylie Minogue, Margot Robbie, Holly Vallance og Jason Donovan.