„Þar sem aðrar hátíðir eru að minnka aðeins og tíminn sem hljómsveitir hafa í sviðsljósinu þegar svo margir blaðamenn og erlendir gestir eru á landinu er naumari fannst okkur tilvalið að halda aðra hátíð,“ segir tónleikahaldarinn James Cox, einn skipuleggjenda Airwhales-hátíðarinnar á Hlemmi Square.
Listviðburðir eru reglulega haldnir á Hlemmi Square en hátíðin er lítil í sniðum miðað við Airwaves sem fer fram á sama tíma; hófst í gær og lýkur á morgun. Í myndskeiðinu er spjallað við Cox um Airwhales, en listamennirnir sem koma þar fram eru ekki á stóru hátíðinni.
Jelena Ćirić er ein þeirra sem koma fram um helgina en enginn aðgangseyrir er inn á hátíðina.