Þórunn Antonía er nú að gera myndband við lagið Ofurkona sem kom út fyrir tveimur vikum. Hekla Egils og Anna Karín Lárusdóttir framleiða og leikstýra myndbandinu. Í myndbandinu sést það glögglega að það er ekki alltaf allt eins og það sýnist í hinum raunverulega heimi.
„Við erum fullkomna fjölskyldan með fullkomnu mömmuna að halda öllu eins og það á að vera en það er að sjálfsögðu ekki þannig þegar betur er að gáð,“ segir Þórunn Antonía um myndbandið og bætir við:
„Við tökum multi tasking á nýtt level í myndbandinu þar sem ég gef Arnaldi syni mínum brjóst á meðan ég ryksuga, syng og reyni að sinna dótturinni á meðan kallinn horfir á boltann.“
Þau Freyja Sóley, dóttir Þórunnar og Valgeir Magnússon, Valli sport, leika líka í myndbandinu ásamt hundinum Pollux en Valli samdi lagið með Þórunni.
„Þetta er svona fullkomna fjölskyldan með fullkomnu mömmuna; pabbi, mamma, dóttir, sonur og hundur. En svo endar allt á öðrum endanum.“
Í næstu viku verður svo myndbandið frumsýnt.