„Maður gerir sín mistök eins og allir aðrir,“ segir Eiður Smári Guðjohnsen í viðtali við Loga Bergmann Eiðsson, spurður um lífið á hátindi knattspyrnuferilsins og hvernig hafi gengið að halda sér á jörðinni á þeim tíma, eða eins og Logi orðar það í viðtalinu: „Þarna er hópur af ungum mönnum, ómenntuðum, með sjúklega mikið af peningum og gríðarlega athygli.“
Eiður Smári segir að hann og liðsfélagar hans í Chelsea hafi oft og tíðum verið barnalegir í hegðun, bæði inni á æfingasvæðinu og utan þess. Hann segir jafnframt að breska pressan hafi oft og tíðum verið erfið og óvægin í umfjöllun sinni um þá félagana. „Það var allt ýkt,” segir hann en viðurkennir jafnframt að hann hafi ekki alltaf „verið upp á tíu“.
Eiður Smári er næsti gestur í þáttunum Með Loga og viðtalið í heild verður komið inn á Sjónvarp Símans Premium á fimmtudaginn.