Leikarinn Rupert Grint, sem er hvað best þekktur fyrir hlutverk sitt í Harry Potter-kvikmyndunum segir að hann hafi alltaf séð neista á milli Emmu Watson og Tom Felton.
Watson fór með hlutverk Hermione Granger en Felton fór með hlutverk erkióvinar þeirra Watson og Grint, Draco Malfoy.
„Það var alltaf eitthvað. Það var smá neisti,“ sagði Grint í viðtali við Entertainment Tonight en hann kynnir nú nýja þætti sem hann leikur í. Þættirnir heita The Servant og eru sýndir á AppleTv+.
Grint sagðist ekki vilja búa til eitthvert slúður um þau, en segist hafa tekið eftir einhverjum neista þegar þau léku öll saman í Harry Potter-kvikmyndunum.
„En við vorum krakkar. Þetta var eins og hver önnur leiksvæðisást,“ sagði Grint og bætti við „Það voru aldrei neinir neistar hjá mér. Ég var neistalaus.“