Arnold Schwarzenegger hefur með nýjustu myndinni um Tortímandann skilað kvikmyndaverunum yfir 500 milljörðum króna í tekjur. Kappinn varð 72 ára í júlí.
Tekjur sjöttu myndarinnar um Tortímandann nema um 250 milljónum dala. Með því hafa tekjur mynda hans skilað 4,1 milljarði dala í kassann, eða ríflega 500 milljörðum króna á núverandi gengi. Þar af eru 2,5 milljarðar vegna miðasölu utan Bandaríkjanna.
Árangurinn er ekki síst eftirtekarverður fyrir þá sök að Schwarzenegger var ríkisstjóri Kaliforníu 2003 — 2011, með endurkjöri 2006.
Eftir það tímabil lék hann meðal annars í kvikmyndinni Expendables III en handritshöfundar hennar voru Katrín Benedikt og maður hennar, Creighton Rothenberger. Katrín ólst upp á Íslandi en fluttist ung með fjölskyldu sinni til Bandaríkjanna.
Það er önnur Íslandstenging við Tortímandann. Þannig er að finna ábreiðu af Hunter, lagi Bjarkar Guðmundsdóttur, á lagalista myndarinnar.