Kærir Miss World fyrir að svipta sig titlinum

Sigurvegari í fegurðarsamkeppni hefur ákveðið að fara í mál við Miss World eftir að hún var svipt titli sínum. 

Hin 24 ára gamla Veronika Didusenko vann fegurðarsamkeppnina Miss Ukraine árið 2017. Hún var svipt titli sínum fimm dögum seinna eftir að skipuleggjendur keppninnar komust að því að hún ætti fimm ára gamlan son. 

Ef hún hefði ekki verið svipt titlinum hefði hún keppt fyrir hönd Úkraínu í Miss World hinn 14. desember. En hún missti titilinn og má ekki taka þátt í alheimsfegurðarsamkeppninni. 

Í reglum keppninnar, sem eru frá 1951, kemur fram að keppendur og sigurvegarar megi ekki vera giftar eða hafa fætt barn. 

Fyrirsætan hefur síðan lýst upplifun sinni sem vandræðalegri og niðurlægjandi. „Mér leið svo illa því þetta er ekki bara mín reynsla, þetta er reynsla þúsunda kvenna um heim allan sem vilja kannski taka þátt en geta það ekki vegna þess að þær eru mæður,“ sagði Didusenko í viðtali við BBC.

„Af hverju má kona ekki taka þátt í fegurðarsamkeppni bara af því að hún er móðir? Það er ekki rétt. Að vera móðir hefur ekki nein áhrif á hæfni mína til að vera fagmannleg eða góð fyrirsæta eða vinna vinnuna mína,“ sagði Didusenko. 

Hún tilkynnti á Instagram að hún ætlaði sér í mál gegn Miss World og sagðist ætla að brjóta blað í sögunni og berjast fyrir sameiginlegum rétti kvenna. 

• Blogga um frétt