Jólapeysa sem var til sölu á vefsíðu verslunarinnar Walmart í Bandaríkjunum vakti bæði reiði og kátínu fjölda fólks þar vestanhafs nú á dögunum.
Á jólapeysunni er mynd af jólasveininum gera sig tilbúinn til þess að neyta fíkniefna og fyrir neðan hann stendur „Let it snow“.
Peysan hefur verið tekin úr sölu af vefsíðu Walmart eftir að glöggur kaupandi benti versluninni á að þarna væri ekki teiknuð upp viðeigandi mynd af jólasveininum.
Walmart hefur gefið út tilkynningu þar sem kemur fram að peysurnar hafi óvart verið seldar í vefverslun þeirra fyrir mistök. Peysurnar hafi verið keyptar frá Kanada þar sem annar söluaðili heldur utan um sölu á peysunum.
Engar skýringar var þó að finna frá Walmart varðandi vörulýsinguna sem fylgdi peysunni: „Besti snjórinn kemur beint frá Suður-Ameríku. Sveinki nýtur augnabliksins þegar hann nær sér í fyrsta flokks snjó frá Kólumbíu.“