Gríðarleg eftirspurn eftir dönsku sjónvarpsefni

Eftirspurn eftir dönsku sjónvarpsefni hefur aukist til muna á undanförnum árum. Raunar hefur eftirspurnin aukist svo mikið, að hæft starfsfólk vantar til þess að svara henni. 

New York Times fjallar í grein sinni um danskan kvikmynda- og sjónvarpsþáttaiðnað. Þar kemur fram að framleiðsla ýmissa danskra sjónvarpsþátta hefur tafist um sex mánuði og jafnvel lengur. Þá er margra ára bið eftir ákveðnu starfsfólki fyrir framleiðsluferlið auk þess sem skortur er á handritshöfundum, upptökumönnum og leikstjórum. 

Sjónvarpsstöðin TV2 og danska kvikmyndastofnunin hafa hvatt danska kvikmyndaskólann til þess að taka inn helmingi fleiri nemendur árlega, en í dag fá 42 nemendur pláss í skólanum árlega. Með þessu er vonast til þess að staðan batni. 

Fyrir áratug voru tvær til þrjár sjónvarpsþáttaraðir í framleiðsluferli á hverjum tíma í Danmörku. Í dag eru að jafnaði um 20 slíkar þáttaraðir í framleiðslu og 20 til 25 kvikmyndir til viðbótar. Á sama tíma hefur starfsfólki í bransanum ekki fjölgað á sama hraða. 

Sjónvarpsþættirnir Brúin hafa notið mikilla vinsælda.

Þáttaraðir á borð við Brúna og Borgina og hafa stóraukið áhuga á dönsku sjónvarpsefni. Aukinn áhugi streymisveitna á borð við Netflix hefur einnig haft mikil áhrif, til að mynda að því leyti að þættir sem hefðu áður aldrei verið framleiddir fá skyndilega fjármagn til framleiðslu. 

Louise Vesth kvikmyndaframleiðandi sagði í samtali við New York Times að hún teldi að aukna velgengni danskra sjónvarpsþátta mætti rekja til frásagnarfærni dönsku þjóðarinnar. 

„Við erum mjög góð í að segja sögur af fólki og samböndum. Þetta nær alla leið aftur í norræna goðafræði. Við erum góð að segja stórar sögur um lítil vandamál,“ sagði Vesth.

• Blogga um frétt