Ozzy heitir fundarlaunum

Gamla brýnið Ozzy Osbourne hefur heitið verðlaunafé, þremur milljónum króna, fyrir upplýsingar sem leitt geta til þess að munum sem voru í eigu gítarleikarans Randys heitins Rhoads verði skilað en þeim var stolið af safni honum til heiðurs í Hollywood undir lok seinasta mánaðar, á sjálfri þakkargjörðarhátíðinni.

Meðal þess sem hvarf var fyrsti rafmagnsgítar Rhoads sem lést í flugslysi árið 1982 en þeir Ozzy störfuðu saman á þeim tíma.

„Ég er í öngum mínum yfir því að þessum áþreifanlegu minningum um Randy og Delores [móður hans, sem rak tónlistarskólann, þar sem safnið er til húsa] hafi verið stolið frá fjölskyldunni, þannig að ég legg persónulega til fundarlaun,“ sagði Ozzy og bætti við að ekkert kæmi í stað slíkra muna.

• Blogga um frétt