Leikarinn Channing Tatum og tónlistarkonan Jessie J eru hætt saman eftir aðeins árs langt samband.
Fyrst heyrðist af sambandi þeirra í október í fyrra og þau sáust síðast saman í október á þessu ári.
„Það var ekkert drama. Þau ákváðu bara að leiðir þeirra myndu skilja núna og eru enn þá góðir vinir,“ sagði heimildarmaður People.
„Channing og Jessie eru með mismunandi forgangsröðun og það fer illa saman. Þau áttu skemmtilegan tíma saman, en sambandið virkaði ekki lengur. Channing þarf að vera mikið í Los Angeles svo hann geti verið með dóttur sinni Everly. Jessie vill heldur vera í Bretlandi,“ sagði heimildarmaðurinn.
Tatum á eina dóttur, Everly, úr fyrra hjónabandi með leikkonunni Jennu Dewan. Illa hefur gengið í forræðisdeilu þeirra Tatum og Dewan á síðustu mánuðum.