Spjallþáttadrottningin Oprah Winfrey styður ákvörðun Meghan Markle og Harry Bretaprins um að hætta öllum konunglegum skyldum og gerast fjárhagslega sjálfstæð.
Slúðurmiðlar vestanhafs, sem og í Bretlandi, segja að hertogahjónin hafi leitað til Opruh og að hún hafi ráðlagt hjónunum að segja skilið við „Sussex Royal“-vörumerkið og stofna sitt eigið. Oprah þvertekur hins vegar fyrir þessar sögusagnir.
„Mér þykir vænt um þau bæði og styð þau heilshugar, sama hvaða ákvörðun þau taka,“ segir í yfirlýsingu frá Opruh vegna Megxit, eins og breskir fjölmiðlar hafa nefnt ákvörðun hjónanna. Oprah segir hjónin ekki þurfa hennar hjálp til að finna út hvað sé fjölskyldunni fyrir bestu.
Oprah er samt sem áður nátengd fjölskyldunni en hún og Doria Ragland, móðir Meghan, eru nánar vinkonur. Oprah og Harry eru sömuleiðis nátengt en þau hafa unnið saman að gerð heimildaþátta um heilsu fyrir Apple. Þá var Oprah gestur í brúðkaupi þeirra í maí 2018.