Capaldi og Dave með flestar tilnefningar

Skoski indí-söngvarinn Lewis Capaldi og rapparinn Dave eru báðir með fjórar tilnefningar til bresku Brit-tónlistarverðlaunanna í ár. Þeir eru tilnefndir í flokki söngvara, lag ársins, nýliði ársins og plata ársins. Tilnefningar voru tilkynntar í gærkvöldi.

Breski rapparinn Dave. Wikipedia/SamuelWren98

Dave er 21 árs rappari frá London sem skaust fram á sjónarsviðið í fyrra með plötunni Psychodrama sem fór beint á topp breska plötulistans. En mest selda plata ársins í Bretlandi er plata Capaldi Divinely Uninspired To A Hellish Extent.

Capaldi var einmitt tilnefndur til Grammy-verðlauna fyrir lagið SomeoneYouLoved sem fór á topp bandaríska lagalistans. 

Lewis Capaldi. AFP

Rapparinn Stormzy, sem var eitt af aðalnúmerunum á Glastonbury-hátíðinni í fyrra, er með þrjár tilnefningar sem og söngkonan Mabel sem er dóttir sænsku stjörnunnar Neneh Cherry. 

Verðlaunin verða afhent 18. febrúar en blaðamaður Guardian bendir á að ekkert komi á óvart — karlar í aðalhlutverki þegar kemur að tilnefningum. Aðeins ein bresk kona er tilnefnd af þeim 25 mögulegu þar sem ekki er kynskipt. Þetta sé hluti af stærri vanda innan tónlistargeirans.

Frétt Guardian

• Blogga um frétt