Þurftu að tvöfalda veislustjórnina vegna metaðsóknar

Þorrablótsnefnd Kópavogsblótsins þurfti að tvöfalda veislustjórnina eftir að ákveðið var að selja 2.400 miða á blótið. Fjölmiðlamaðurinn Logi Bergmann átti að vera einn síns liðs en fjölmiðlamaðurinn Rúnar Freyr Gíslason ætlar að hlaupa undir bagga með honum. 

Þorrablót Breiðabliks, HK og Gerplu fer fram á föstudaginn kemur í Fífunni í Kópavogi. Stuðlabandið mun leika fyrir dansi og sér Múlakaffi um veitingarnar. 

„Jói í Múlakaffi er örugglega eini kokkurinn á landinu sem getur tekið að sér svona stórt blót,“ segir Jón Sig­urður Garðars­son, einn af skipu­leggj­end­um Kópa­vogs­blóts­ins.

Jón segir að þau hafi unnið sleitulaust að blótinu síðastliðna þrjá mánuði og nú í vikunni muni um 200 sjálfboðaliðar koma að því að gera Fífuna að glæsilegum veislusal. 

„Við viljum leggja mikið upp úr upplifun fólksins. Við ætluðum að hafa þetta í körfuboltasalnum en þegar fjöldi gesta var orðinn svona mikill þurftum við að færa þetta úr honum yfir í knattspyrnuhöllina. Körfuboltasalurinn verður því notaður sem fatahengi,“ segir Jón.

Það seldist upp á Kópavogsblótið á mettíma í nóvember síðastliðnum. Fyrst fóru 1.800 miðar í sölu og seldust þeir upp á tveimur mínútum. Síðar sama dag var 600 miðum bætt við og ruku þeir líka út. Talan endaði því í 2.400 seldum miðum. Í fyrra voru 1.200 miðar seldir á blótið og hefur það því tvöfaldast að stærð.