Í fullu fjöri með staf á rauða dreglinum

Tónlistarmaðurinn Ozzy Osbourne mætti með staf á Grammy-verðlaunahátíðina í Los Angeles í gærkvöldi. Þetta er í fyrsta skipti sem hann mætir á opinberan viðburð eftir að hann greindi frá því að hann hefði greinst með parkinsonsjúkdóm í febrúar í fyrra. 

Osbourne virtist vera í fullu fjöri en hann datt illa nú snemma árs og þurfti að fara í aðgerð á hálsi í kjölfarið. Hann mætti í sínu fínasta pússi ásamt dóttur sinni Kelly í gær. Eiginkona hans, Sharon, var í vinnunni en hún er spjallþáttastjórnandi á CBS-sjónvarpsstöðinni og var þar af leiðandi að taka viðtöl við fræga fólkið. 

Sharon sagði í viðtali ásamt eiginmanni sínum fyrr í vikunni að greiningin væri enginn dauðadómur. Ozzy sjálfur sagðist ætla að fara á tónleikaferðalag um leið og hann yrði frískari, en aðgerðin hefur haft verri áhrif á hann en parkinsonsjúkdómurinn.