Tónlistarkonan Tinashe segist hafa verið drukkin í hálft ár eftir að hún frétti að kærastinn hennar fyrrverandi, Ben Simmons, væri kominn í samband með fyrirsætunni Kendall Jenner.
Tinashe greindi frá þessu í dögurði fyrir Grammy-verðlaunahátíðina á laugardag. Hún og Simmons voru saman í tvö ár og segir hún að það hafi verið versti dagur lífs hennar þegar hún frétti að hann væri kominn í samband með Jenner.
Hún segist vera búin að ná sér í dag en í um 6 mánuði hafi ekki runnið af henni. Jenner og Simmons voru saman árið 2018 en hættu saman. Þau eru þó sögð vera byrjuð aftur saman en þau eyddu gamlárskvöldi saman og Jenner hefur mætt á nokkra körfuboltaleiki Simmons það sem af er ári.