Katrín hertogaynja af Cambrigde birti í gær ljósmyndir sem hún tók af eftirlifendum helfararinnar. Ljósmyndun er eitt af áhugamálum hertogaynjunnar og er hún meðal annars verndari samtaka um ljósmyndun barna.
Myndirnar birti Katrín á Instagram-reikningi Cambridge-fjölskyldunnar. Hún tók myndirnar af því tilefni að 75 ár eru liðin frá frelsun útrýmingarbúðanna Auschwitz. Katrín og Vilhjálmur Bretaprins tóku þátt í minningarathöfn í Bretlandi í gær.
View this post on InstagramA post shared by Kensington Palace (@kensingtonroyal) on Jan 26, 2020 at 2:05pm PST
Á fyrstu myndinni er Steven Frank ásamt barnabörnum sínum Meggie og Trixie. Steven var sendur ásamt móður sinni og bræðrum til Westerbork búðanna og síðan til Theresienstadt. Steven og bræður hans tveir voru ásamt 90 börnum einu börnin sem lifðu af vistina í útrýmingarbúðunum. 15 þúsund börn voru send þangað.
Á seinni myndinni er Yvonne Bernstein ásamt barnabarni sínu Chloe. Yvonne var falin í Frakklandi meðan á stríðinu stóð. Frændfólk hennar faldi hana og hún flutti milli staða reglulega og skipti um nafn.
„Ég vildi gera ljósmyndirnar af Yvonne og Steven mjög persónulegar til að fagna fjölskyldum þeirra og lífi sem þau hafa byggt síðan þau komu til Bretlands á 5. áratugnum. Fjölskyldurnar tóku með sér persónulega muni sem sjást á ljósmyndunum,“ er haft eftir Katrínu hertogaynju í færslunni.