Alls eru 33 athafnir bókaðar í febrúarmánuði hjá lífsskoðunarfélaginu Siðmennt. Siggeir F. Ævarsson, framkvæmdastjóri félagsins, segir að allt stefni í að árið verið mikið giftingarár.
Þetta ár, árið 2020, þykir mörgum falleg tala og fyrir þá sem spá mikið í svona lagað er því febrúarmánuður, annar mánuður ársins, heillandi. Nú á sunnudaginn, 2.2. 2020, fara fram þrjár giftingar og fimm nafngjafir á vegum Siðmenntar. Hinn 20.2. 2020 eru þrjár giftingar á dagskrá og 22.2. 2020 sjö og ein þeirra klukkan 20:02.
Þar að auki er hlaupár og er dagsetningin 29. febúar líka vinsæl, en sjö giftingar verða þá.
Siggeir segir að mun fleiri athafnir fyrir árið 2020 hafi verið bókaðar í lok árs 2019 en vanalega. Nú var búið að bóka 75 athafnir í lok árs, töluvert miklu fleiri en á síðustu árum. Í lok árs 2017 voru 48 bókaðar fyrir 2018, í lok árs 2018 var 51 athöfn bókuð fyrir 2019.
Í janúar hafa svo bæst við enn fleiri athafnir, alls 53, og því 128 athafnir á dagskrá hjá Siðmennt 2020. Af þessum 128 athöfnum eru 107 giftingar, 19 nafngjafir og tvær útfarir.
Þegar horft er lengra inn í árið er búið að bóka fjórar giftingar 6.6. 2020 og fimm hinn 8.8. 2020. Siggeir grunar að dagurinn 10.10. 2020 verði einnig vinsæll.
Í Dómkirkjunni í Reykjavík hafa ekki allir komist að á vinsælustu dagsetningunum. Samkvæmt skrifstofu Dómkirkjunnar eru óvenju mörg brúðkaup á dagskrá hjá þeim þetta árið og dagsetningar eins og 10.10. hafa verið vinsælar. Ekkert brúðkaup verður þó í kirkjunni á sunnudaginn kemur.
Dagurinn 20.6. 2020 hefur verið gríðarlega vinsæll í Fríkirkjunni í Reykjavík og samkvæmt skrifstofu kirkjunnar er kominn biðlisti fyrir þann dag. Aðrar dagsetningar á árinu standa ekki enn upp úr hvað varðar bókanir.
Í Hallgrímskirkju hafa engar sérstakar dagsetningar staðið upp úr og ekki heldur í Akureyrarkirkju. Gyða Hrönn Sigþórsdóttir, kirkjuritari hjá Akureyrarkirkju, segir að þau hafi ekki tekið eftir því að fólk hafi reynt að tryggja sér einhverjar ákveðnar dagsetningar í tæka tíð. Þó er búið að bóka vinsæla daga eins og 10.10. 2020 en Gyða segir að fjöldinn sé svipaður og síðastliðin ár.