Leikkonan Amanda Bynes vill nú losna undan forræði móður sinnar. Móðir hennar, Lynn Bynes, hefur haft forræði yfir dóttur sinni síðan árið 2014.
Amanda sagði frá því á myndbandi á Instagram á laugardag að hún ætli sér að fara fyrir dómara á næstu dögum í þeirri von að hún fái sjálfræði sitt aftur. Hún hefur verið edrú í yfir eitt ár og býr nú í húsnæði fyrir fólk sem er að fóta sig í lífinu eftir áfengismeðferð.
Samkvæmt heimildarmanni UsWeekly vill móðir hennar enn halda í forræðið og segir Amöndu ekki enn treystandi. „Mömmu hennar finnst allt í lagi að hún hafi óskað eftir fundi með dómara til að ræða forræðið yfir henni. Lynn finnst Amanda þó ekki í aðstöðu til að taka nokkrar ákvarðanir um meðferð sína. Lynn mun óska eftir því að Amanda verði enn í öruggum aðstæðum,“ sagði heimildarmaðurinn.
„Ég er búin að fara á meðferðarheimili sem kosta 5.200 [Bandaríkjadali] á mánuði. Það er engin ástæða fyrir því að ég fari ekki til þerapista sem tekur sjúkratrygginguna mína gilda og þá myndi það kosta 5.000 minna á mánuði. Þetta er ástæðan fyrir því að ég hef óskað eftir fundi með dómara í næstu viku,“ sagði Amanda í myndbandinu.
Bynes greindi frá því á dögunum að hún hafi fundið ástina og sé nú trúlofuð. Hún getur þó ekki gift sig nema með leyfi frá móður sinni, verði hún áfram með forræði yfir henni.