Bandaríski tónlistarmaðurinn Beck er væntanlegur til Íslands í júní, en hann mun halda tónleika í Laugardalshöll. Ásamt honum mun norður-írska hljómsveitin Two door cinema club koma fram á tónleikunum.
Beck hefur verið heimsþekktur tónlistarmaður síðan árið 1994 þegar platan Mellow gold kom út, en á henni var meðal annars að finna slagarann Loser. Síðan þá hefur hann meðal annars gefið út plöturnar Odelay, Mutations, Midnite Vultures, Sea Change, Modern Guilt og nú síðast Hyperspace sem kom út í fyrra.
Beck hefur meðal annars unnið til sjö Grammy verðlauna á ferlinum og hlotið fjölda annarra verðlauna. Tónleikarnir fara fram 2. júní, en almenn sala miða hefst á föstudaginn.