Tónlistarkonan Ariana Grande finnur til með aðdáendum sínum sem margir hverjir eiga erfitt með að standa skil á greiðslum um mánaðarmótin vegna kórónuveirufaraldursins. Hefur hún gefið þó nokkrum aðdáendum peninga að því fram kemur á vef TMZ.
Grande er sögð hafa átt í samskiptum við aðdáendur sína í gegnum samfélagsmiðla. Einhverjir aðdáendur hennar hafa lýst fyrir henni erfiðleikum sem þeir glíma við núna. Á hún að hafa sent að minnsta kosti tíu aðdáendum peninga. Eru þetta upphæðir á bilinu 500 til 1.500 bandaríkjadalir eða frá 70 þúsund til rúmlega 210 þúsund íslenskar krónur.
Greiðslurnar virðast vera nokkuð tilviljunarkenndar. Fólkið á það þó sameiginlegt að starfa í verslun og þjónustu og hefur orðið fyrir tekjutapi í kjölfar útbreiðslu kórónuveirunnar.