Pink með kórónuveiruna

Tónlistarkonan Pink greindi frá því í gær að hún hefði greinst með kórónuveiruna. Hún biðlar til aðdáenda sinna um að halda sig heima til þess að verjast veirunni. 

Pink segir í færslu á Instagram að hún og þriggja ára gamall sonur hennar Jameson hafi sýnt einkenni veirunnar fyrir tveimur vikum. Sem betur fer hafi þau komist í sýnatöku og greindist hún með veiruna. 

„Við fjölskyldan höfðum sem betur fer haldið okkur heima fyrir það og ætlum að gera það næstu tvær vikur samkvæmt læknisráði. Fyrir nokkrum dögum fórum við aftur í sýnatöku og sem betur fer vorum við ekki lengur með veiruna,“ skrifar Pink í færslunni.

Hún greindi einnig frá því að hún hefði gefið hálfa milljón bandaríkjadala til Temple-háskólasjúkrahússins í Philadelphia í minningu móður sinnar Judy Moore, en hún vann í 18 ár á hjartadeildinni þar.

Þar að auki gaf hún hálfa milljón bandaríkjadala til neyðarsjóðs Los Angeles-borgar í Kaliforníu. 

• Blogga um frétt