John Prine látinn af völdum veirunnar
Setja bókamerki
Bandaríski tónlistarmaðurinn John Prine er látinn, 73 ára gamall, eftir að hafa sýkst af kórónuveirunni. Í síðustu viku greindi eiginkonan hans frá því að Prine hefði verið í átta daga á gjörgæslu í öndunarvél og væri með lungnabólgu í báðum lungum.
Prine, sem eitt sinn var kallaður Mark Twain bandarískrar tónlistar, starfaði í um fimm áratugi í tónlistarbransanum. Bob Dylan sagði hann einn af sínum uppáhaldslagahöfunum og lagið Lake Marie var í sérstöku uppáhaldi.
Prine fæddist árið 1946 í Illinois og vakti athygli í þjóðlagasenunni í Chicago seint á sjöunda áratugnum eftir að Kris Kristoffersson uppgötvaði hann. Fyrsta platan hans sem kom út árið 1971 féll í kramið hjá gagnrýnendum. Eitt af þekkustu lögunum hans var Your Flag Decal Won't Get You Into Heaven Anymore. Þar gagnrýndi hann Víetnamstríðið harðlega.
Hann gaf út 19 hljóðversplötur og vann til Grammy-verðlauna á ferli sínum. Á síðasta ári var hann vígður inn í Frægðarhöll lagahöfunda í Bandaríkjunum.
Bruce Springsteen er á meðal þeirra sem hafa tjáð sig um andlát Prines. Á twittersíðu sinni segir hann að Prine hafi verið sannkölluð þjóðargersemi.
Segjast hafa skotið niður langdræga sprengjuvél
Sárt að horfa upp á illa meðferð fjármuna
Hæstiréttur staðfestir vanhæfi alls Landsréttar
„Búið að vera í dreifingu í einhvern tíma“
Bjarkey stendur við skammarbréf Svandísar
Segjast ekki vera á kaldri slóð