Lagið sem Ítalir ætluðu að senda í Eurovision-keppnina í Rotterdam var kosið það besta í þættinum Okkar 12 stig í Ríkissjónvarpinu.
Fai rumore með Diodato hlaut 12 stig í íslensku kosningunni. Í öðru sæti voru Rússar með 10 stig og Litháar í því þriðja. Ekki mátti kjósa lagið Think About Things með Daða og Gagnamagninu.
Það var enginn annar en bandaríski leikarinn Will Ferrell sem tilkynnti sigurvegarann. Hann sagði það mikinn heiður og bætti því við að hann hefði skemmt sér vel við tökur á Hollywood-myndinni Eurovision, sem var að hluta til tekin upp hérlendis.
Ferrell sagði Ísland vera fallegt land og Húsavík fallegan bæ en tökurnar fóru þar fram.