Friðrik mikli og Friðrik litli

Friðrik Þór Friðriksson kvikmyndaleikstjóri og Friðrik Róbertsson, Flóni, rappari, hittust …
Friðrik Þór Friðriksson kvikmyndaleikstjóri og Friðrik Róbertsson, Flóni, rappari, hittust á Port 9 í síðustu viku. mbl.is/Snorri

Tveir karlar finnast á öldurhúsi og gefa sig á tal hvor við annan. Það þurfa ekki að vera tíðindi, nema auðvitað þeir séu báðir þjóðþekktir menn og hvor tveggja heiti Friðrik. 

Nákvæmlega það gerðist síðasta laugardag á Port 9 í miðbæ Reykjavíkur. Þar vatt málum svo fram að Friðrik Þór Friðriksson kvikmyndaleikstjóri fékk sér sæti við sama borð og Friðrik Róbertsson rappari, öllu betur þekktur sem Flóni.

Þeir tóku tal saman og ræddu um daginn og veginn en samskiptin einkenndust þó ekki af því stórkarlalega hjali sem oft er viðhaft þegar frægur hittir frægan. Þar réði ekki nauðsynlega botnlaus hógværð og lítillæti, heldur öllu fremur gagnkvæm vanþekking þeirra á afrekum hvors annars: Þessir tveir stórfrægu Friðrikar báru engin sérstök kennsl á hvor annan.

Friðrik Þór Friðriksson vissi ekki hver Flóni var og Flóni vissi ekki hver Friðrik Þór var. 

Þetta tvíblinda eðli samræðnanna var gegnumgangandi og þær gátu farið fram alls kostar án þess að fram kæmi að hvor tveggja mannanna væri heimsfrægur á Íslandi. Sjónum var í stað þess beint að öðrum hversdagslegum viðfangsefnum, svosem því að Friðrik yngri væri KR-ingur, sem gladdi Friðrik eldri, sem sjálfur er Framari en einnig stofnandi knattspyrnufélagsins Árvakurs, þar sem saman komu meðal annars Framarar og KR-ingar.

Eftir drykklanga stund fór hvor sína leið fróðari um hvaðeina en með öllu ómeðvitaður um að hann hafi verið að tala við einn frægasta Friðrik landsins.

mbl.is

Stjörnuspá »

Hrútur

Sign icon Finndu leið til að koma hugmyndum þínum á framfæri þannig að enginn misskilningur standi þeim í vegi. Dropinn holar bergið og einn góðan veðurdag fjölgar áhangendunum.

Stjörnuspá »

Hrútur

Sign icon Finndu leið til að koma hugmyndum þínum á framfæri þannig að enginn misskilningur standi þeim í vegi. Dropinn holar bergið og einn góðan veðurdag fjölgar áhangendunum.