Kassagítar sem Kurt Cobain, söngvari Nirvana, spilaði á í upptökum á órafmögnuðum tónleikum MTV-sjónvarpsstöðvarinnar árið 1993, seldist á uppboði fyrir sex milljónir dollara um helgina, eða sem nemur rúmum 830 milljónum króna.
Cobain lést aðeins fimm mánuðum eftir upptökurnar. Gítar hefur aldrei selst á jafn háu verði á uppboði í tónlistarsögunni, en í fyrra seldist gítar David Gilmour úr Pink Floyd fyrir fjórar milljónir dollara.
Gítar Cobains, sem er af gerðinni Martin D-18E og var smíðaður árið 1959, er nú í eigu Ástralans Peter Freedman, en hann er eigandi hljóðnemaframleiðandans Rode Microphones. Freedman hyggst ferðast með gítarinn um heiminn.