Katrín hertogynja er sögð ekki vilja skyggja á eiginmann sinn Vilhjálm prins þó svo að hún hafi sjálf sterka rödd út á við. Þetta segja konunglegir sérfræðingar um stöðu hennar innan konungsfjölskyldunnar.
Hertogahjónin Katrín og Vilhjálmur hafa verið dugleg að funda með fólki með hjálp fjarfundarforritsins Zoom. Samstarf þeirra hjóna hefur vakið athygli sérfræðinga þar sem Katrín passar sig á því að skyggja aldrei á Vilhjálm. Þá hefur Katrín heimsótt gróðrastöðvar eftir að slakað var á samkomubanni þar ytra.
„Katrín er að mörgu leyti eins og Filippus prins og hvernig hann styður drottninguna. Hún skyggir ekki á Vilhjálm en hefur þó margt til málanna að leggja,“ segir Penny Juror sérfræðingur í bresku konungsfjölskyldunni. Þá var á sínum tíma sagt að Karl Bretaprins hafi verið óánægður með það hversu mjög Díana prinsessa stal senunni á meðan hjónabandi þeirra stóð. Katrín nær betur að feta hinn gullna meðalveg. Hún er vinsæl og virk í samfélaginu án þess þó að skyggja á Vilhjálm.
Þá hafa sérfræðingar líkt hjónabandi Vilhjálms og Katrínar við hjónaband drottningarinnar. „Hjónaband Vilhjálms og Katrínar var nútímalegt að því leyti að það var byggt á ást en að öðru leyti er það mjög hefðbundið. Hún virðist leggja áherslu á að styðja sinn eiginmann og vera til staðar fyrir hann,“ segir Sarah Gristwood sem ritað hefur margar bækur um konungsfjölskylduna.