Cooper Hefner, yngsti sonur Hugh Hefner stofnanda Playboy-tímaritsins, hyggst bjóða sig fram til öldungadeildar Kaliforníuþings í ríkisþingkosningunum sem fara fram árið 2022.
Hefner hyggst bjóða sig fram fyrir Demókrataflokkinn í 30. héraði Kaliforníu. Öldungadeildarþingmaður 30. héraðs í Kaliforníu er Holly Mitchell. Hún hefur gefið það út að hún sækist ekki eftir endurkjöri heldur sækist hún eftir því að komast í borgarstjórn Los Angeles-borgar.
Hingað til hefur Hefner aðallega starfað í fjölmiðlum. Hann erfði Playboy-ríkidæmið af föður sínum en sagði skilið við fyrirtækið vorið 2019.
Síðan þá hefur hann unnið að því að koma á koppinn sínu eigin fyrirtæki auk þess sem hann hefur þjónað herskyldu í flugher Bandaríkjanna.
Hann greindi frá framboðinu í viðtali við Hollywood Reporter í gær. Þeir sem fylgjast með Hefner á Instagram hafa eflaust tekið eftir því að hann hefur látið sig varða ýmis pólitísk mál á síðustu á misserum.