Íslenska hljómsveitin Kaleo kom fram í spjallþættinum Late Night með Seth Meyers í Bandaríkjunum í gærkvöldi. Atriðið var óvenjulegt en þættirnir eru með óhefðbundnu sniði vegna kórónuveirunnar.
Söngvarinn Jökull Júlíusson og munnhörpuleikarinn Þorleifur Gaukur Davíðsson fluttu lagið Break My Baby í þættinum. Í stað þess að koma fram í myndveri eins og venja er í þáttum sem þessum var atriðið tekið upp á árabát á Elliðavatni á Íslandi.
Þetta er ekki í fyrsta skipti sem Kaleo kemur fram í þættinum og hefur hljómsveitin spilað í flestum stóru spjallþáttunum í Bandaríkjunum.
Hér fyrir neðan má sjá innslagið með Kaleo.