Krónprinsessa brýtur hefðir

Viktoría krónprinsessa Svíþjóðar fagnaði 43 ára afmæli sínu í vikunni. Samkvæmt venju voru tónleikar haldnir til heiðurs henni í rústum Borgholmshallarinnar á afmælisdeginum. Athygli vakti þó að krónprinsessan ákvað í þetta skipti að klæðast ekki sænskum þjóðbúningi líkt og fyrri ár heldur var hún í látlausum hvítum sumarkjól. 

Upplýsingafulltrúi konungsfjölskyldunnar sagði að í ljósi kórónuveirunnar þurfti að hugsa allt upp á nýtt hvað varðar hátíðahöldin í ár. Þannig hafi opnast gluggi til þess að víkja frá vananum og átti það líka við um fataval prinsessunnar. 

Þá fékk Magdalena prinsessa ekki að vera viðstödd afmælisfögnuð systur sinnar þar sem hún er búsett í Bandaríkjunum. Strangar reglur gilda um komu fólks frá Bandaríkjunum vegna kórónuveirunnar.