Tónskáldið Anna Þorvaldsdóttir er tilnefnd til virtra verðlauna stofnunar Pierre prins af Mónakó, Fondation Prince Pierre de Monaco Music Composition Prize, fyrir sinfóníuverkið AIÔN. Önnur tilnefnd tónskáld eru m.a. Thomas Adès, Steve Reich, Chaya Czernowin, Outi Tarkiainen og Pascal Dusapin. Verðlaunin hafa verið veitt allt frá árinu 1960 og af fyrri verðlaunahöfum má nefna György Ligeti, Sofiu Gubaidulina, Elliot Carter, Unsuk Chin, György Kurtág og Pierre Boulez.
AIÔN er samstarfsverkefni Íslenska dansflokksins, Sinfóníuhljómsveitar Íslands og Sinfóníuhljómsveitar Gautaborgar og var verkið frumflutt af Sinfóníuhljómsveit Gautaborgar og Íslenska dansflokknum 24. maí í fyrra í Tónlistarhúsinu í Gautaborg.