Daníel prins, eiginmaður Viktoríu krónprinsessu Svíþjóðar, prýðir nú auglýsingaskilti fyrir gleraugu í Marokkó. Gleraugnaverslunin Optique Chaab er talin hafa notað mynd af prinsinum í leyfisleysi til þess að markaðssetja gleraugu sín í Marokkó. Þetta kemur fram í frétt Expressen um málið.
Upplýsingafulltrúi sænsku konungshallarinnar segir að verið sé að rannsaka málið. Þetta er ekki í fyrsta skipti sem sænsku hjónin rata í auglýsingar án vitundar konungshallarinnar. Á síðasta ári birtist mynd af þeim í kínverskri auglýsingu þarlends fasteignafélags. Sænska hirðin tók á málunum, hafði samband við umrætt félag og bað þá um að fjarlægja auglýsinguna.