Harry Bretaprins og Meghan hertogaynja af Sussex hafa greitt til baka það sem þau skulduðu bresku krúnunni fyrir endurbætur á heimili þeirra í Bretlandi, Frogmore Cottage.
Í tilkynningu í gær, mánudag, sögðu Harry og Meghan að þau væru búin að greiða skuldir sínar að fullu. Endurbæturnar á húsinu kostuðu um 2,4 milljónir punda og voru greiddar með hinum svokallaða þjóðhöfðingjastyrk sem breskir skattgreiðendur borga í.
Enn fremur kom fram í tilkynningunni að hjónin hefðu ekki bara greitt skuldir sínar heldur einnig gefið framlag í sjóðinn.
Frogmore Cottage mun enn verða heimili Harry og Meghan þegar þau koma til Bretlands.
Í síðustu viku var tilkynnt að Harry og Meghan hefðu gert samning við Netflix um framleiðslu ýmiss konar efnis.