Michael Cohen, fyrrverandi einkalögfræðingur Donalds Trumps Bandaríkjaforseta, heldur því fram í nýrri bók sinni að forsetinn hafi ekki kippt sér mikið upp við þá hugmynd að Melania Trump færi frá honum.
Cohen heldur því fram að Trump hafi verið sama um viðbrögð Melaniu við meintu framhjáhaldi hans. Segir hann að Trump hafi litið á hjónabandið eins og hvern annan viðskiptasamning.
„Ég get alltaf fundið mér aðra konu. Það er ekkert vandamál fyrir mig, ef hún vill fara þá er það svoleiðis,“ skrifar Cohen í bókinni að því fram kemur á vef Daily Mail.
Hjónaband Melaniu og Donalds Trumps er mörgum hulin ráðgata og hafa ýmsar sögur varðandi það farið á kreik. Það vakti athygli þegar Melania ákvað að flytja ekki strax í Hvíta húsið með manni sínum og hafa þau verið sögð sofa hvort í sínu herberginu.
Fleira kemur í ljós um forsetann í bókinni. Er Trump meðal annars sagður hafa notað dóttur sína Ivönku Trump til þess að trufla einbeitingu karlmanna á viðskiptafundum.